काठमाण्डाै महानगरपालिकाले सडक व्यापारीलाई विस्थापन गर्न खोजेको भन्दै व्यवसायीहरूले आन्दोलन गरेका छन् । सडक व्यापार गर्ने साना व्यवसायीहरूले महानगरपालिकाले आफूहरूलाई विस्थापित गर्न खाेजेकाे भन्दै आज आइतवार काठमाण्डाैमा भेला भई प्रदर्शन गरेका हुन् ।
महानगरले जबरजस्ती विस्थापन गर्न खोजेको भन्दै साइकल, ठेलागाडा, फुटपाथमा व्यवसाय गर्ने व्यवसायीहरूले आन्दाेलन गरेका हुन् । व्यवसायीहरूको आन्दोलनमा सहभागी कानुन व्यवसायी सुविन मुल्मीले महानगरले सडक व्यापारीहरूलाई गरिखान नदिएको दाबी गर्नुभयाे । उहाँले सडक व्यापारलाई कानुनले रोकेको अवस्था नरहेको बताउँदै महानगरले गैरकानुनी रूपमा व्यवसायीहरूको सामान खोसेर लिलाम गरी पैसा कमाउने काम गरेको आरोप लगाउनुभयो ।
व्यवसायीहरूले ‘शहर सबैका लागि कि धनीका लागि मात्रै ?’, ‘गरी खान देउ’ लगायतका नारा लगाएर आन्दोलन गरेका छन् ।
